Archive for მარტი, 2010


ამჯერად გთავაზობთ გამოთქმებს, აფორიზმებს ან უბრალოდ ხუმრობებს, რომლებიც ჩემი აზრით ყველამ უნდა იცოდეს. არ აქვს მნიშვნელობა იცით თუ არა ქვემოთ მოყვანილი გამოთქმები, მათი გადაკითხვით მგონი მაინც ნასიამოვები დარჩებით, რადგან არც თუ ისე ბევრი რამ არის ამ სამყაროში კარგად და დროულად წარმოთქმულ ფრაზაზე უკეთესი…

იჩქარე ნელა” – ოქტავიან ავგუსტუსი, რომის პირვლეი იმპერატორი

მისი უკანასკნელი სიტყვები იყო: “როგორ ფიქრობთ კარგად ვითამაშე თუ არა ჩემი ცხოვრების კომედია?“.

აიზეკ აზიმოვი

ვცდილობ თუ არა ღმერთის პოვნას? ის ჩემზე ჭკვიანია, თვითონ სცადოს ჩემი პოვნა” – აიზეკ აზიმოვი

მუჰამედ ალი

ბოქსი – როცა უამრავი თეთრკანიანი უყურებს როგორ ურტყამს ერთმანეთს ორი შავკანიანი” – მუჰამედ ალი

“მე დავინახე როგორ ეჩხუბებოდა ჯორჯ ფორმენი ჩრდილს და ჩრდილმა მოიგო” – მუჰამედ ალი

“ამ რესტორანში არავინ აღარ დადის, იმიტომ რომ ის სულ სავსეა” – იოგი ბერა (ამერიკელი ბეისბოლისტი)

მარტოხელა ცხოვრობს როგორც მეფე და კვდება როგორც ძაღლი, დაქორწინებული ცხოვრობს როგორც ძაღლი, სამაგიეროდ კვდება როგორც მეფე” – ჟან ანუი

არ ჰყავს მეგობრები იმას, ვისაც ისინი ბევრი ჰყავს” – არისტოტელე

დრო ბრწყინვალე მასწავლებელია, მაგრამ სამწუხაროდ ის კლავს თავის მოსწავლეებს” – ჰექტორ ბერლიოზი

ერთადერთი სხვაობა რელიგიას და სექტს შორის არის უძრავი ქონება, რომელიც მათ გააჩნიათ” – ფრენკ ზაპა

“ორი ელემენტი, რომელიც ყველაზე ხშირად გვხვდება სამყაროში – წყალბადი და სისულელე” – ფრენკ ზაპა

ფრენკ ზაპა

როკ–ჟურნალისტია – როდესაც ტიპები, რომლებმაც არ იციან წერა, ინტერვიუს ართმევენ ტიპებს, რომლებმაც არ იციან ლაპარაკი, ტიპებისთვის რომლებმაც არ იციან კითხვა” – ფრენკ ზაპა

ყოველთვის მიკვირდა როდესაც ქალებს უშვებდნენ ეკლესიაში. რაზე უნდა ესაუბრონ მათ ღმერთს?” – შარლ ბოდლერი

ღმერთი არის, მაგრამ მე მისი არ მწამს” – ოსიპ ბრიკი

როდესაც ვოლტერს სიკვდილის წინ შესთავაზეს, ეშმაკზე უარის თქმა, მან უპასუხა: “ახლა არ არის ახალი მტრების გაჩენის დრო“.

ვაზროვნებ, ესე იგი ვარსებობ” – რენე დეკარტი

მე ვაზროვნებ, ესე იგი დეკარტი არსებობს” – სოლ სტეინბერგი

მაჰათმა განდის ჰკითხეს:

–რას ფიქრობთ დასავლურ ცივლიზაციაზე?

ვფიქრობ ეგ კარგი იდეა იქნებოდა.

სალვადორ დალი

გიჟს და ჩემს შორის მხოლოდ ერთი სხვაობაა: გიჟს ჰგონია რომ ნორმალურია, მე კიდევ ვიცი რომ არ ვარ” – სალვადორ დალი

მე სიღარიბეში ვცხოვრობდი, ხოლო მოვკვდები მდიდარი. ისე პირიქით უკეთესი იქნებოდა” – ბენჟამინ დიზრაელი

თუ გსურთ ადამიანის გული მოიგოთ, მიეცით მას საშუალება გაჯობოთ კამათში” – ბენჟამინ დიზრაელი

ვუდი ალენი

მე ებრაული ტრადიციებით გამზარდეს, რომელიც კრძალავდა არაებრაელ ქალზე დაქორწინებას, შაბათს საღამოს გაპარსვას და განსაკუთრებით შაბათ საღამოს არაებრაელი ქალის გაპარსვას” – ვუდი ალენი

ჩემს ცოლს არ სურს გაზრდა – მე აბაზანას ვიღებ, ის კიდე ჩემს გემებს ძირავს” – ვუდი ალენი

თქვენთვის მე ათეისტი ვარ, ღმერთისთვის კი ლოიალური ოპოზიცია” – ვუდი ალენი

მამაჩემი ცოტა გაბუდული რომ ყოფილიყო, 3 წლით უფროსი ვიქნებოდი” – მარსელ აშარი

აი ჯენტლმენი – ის არ დაარტყამს ქალს, ქუდის მოხდის გარეშე” – მარსელ აშარი

მიხაილ ჟვანეცკი

ოლიმპოს მთიდან დაბრუნების შემდეგ დიოგენეს ჰკითხეს, ბევრი ხალხი იყო თუ არა იქ. დიოგენემ უპასუხა: “ხალხი კი, ადამიანი ცოტა“.

თავი ვერ შეიკავა, გააღო მიმზიდველი პირი და უმალ გააფუჭა მშვენიერი ტანი და ძვირფასი საცურაო კოსტუმი” – მიხაილ ჟვანეცკი

“ის ბებერი იდიოტია, თუმცა აქ ასაკი არაფერ შუაშია” – მიხაილ ჟვანეცკი

“არასდროს განსაჯოთ ადამიანზე მათი მეგობრების მიხედვით, იუდას მშვენიერი მეგობრები ყავდა” – პოლ ვალერი

რა მაქვს საერთო ებრაელებთან? მე საკუთარ თავთანაც თითქმის არაფერი მაქვს საერთო” – ფრანც კაფკა

ქვეყანაში რომელსაც კარგად მართავენ რცხვენიათ სიღარიბის, ქვეყანაში რომელსაც მართავენ ცუდად – სიმდიდრის” – კონფუცი

“ცხოვრება მავნებელია. მისგან კვდებიან” – სტანისლავ ლეცი

სასჯელმა არ უნდა გამოიწვიოს იმაზე მეტი შეშფოთება, ვიდრე დანაშაულმა” – კარლ მარქსი

ყველა შილინგს სხვის ჯიბეში ის პირად შეურაცხყოფად იღებდა” – ო. ჰენრი

თუ თქვენ მოიწყინეთ მაშინ, როდესაც მარტო ხართ, ესე იგი ცუდ საზოგადოებაში ხართ” – ჟან პოლ სარტრი

არაფერი არ იცვლება ისე ხშირად, როგორც წარსული” – ჟან პოლ სარტრი

ალფრედ ჰიჩკოკი

“საუკეთესო მსახიობები რა თქმა უნდა დისნეის ჰყავს, ცუდს ის უბრალოდ შლის” – ალფრედ ჰიჩკოკი

ალფრედ ჰიჩკოკი

ინდივიდუალური სტილი არის საკუთარი თავის პლაგიატი” – ალფრედ ჰიჩკოკი

ფილმის ხანგრძლივობა ზუსტად უნდა შეესაბამებოდეს ადამიანის შარდის ბუშტის გამძლეობას” – ალფრედ ჰიჩკოკი

საუკეთესო მსახიობი – ადამიანი, რომელსაც განსაკუთრებით კარგად შეუძლია აკეთოს არაფერი ” – ალფრედ ჰიჩკოკი

ილაპარაკო დაუფიქრებლად, იგივეა რაც, ისროლო დაუმიზნებლად” – მიგელ სერვანტესი

იწყებ მოწევას, რათა დაამტკიცო რომ კაცი ხარ, დაახელობით 30 წლის შემდეგ იგივე მიზეზით ცდილობ თავი დაანებო მოწევას” – ჟორჟ სიმენონი

ღმერთის ერთადერთი გასამართლებელი საბუთი ისაა, რომ ის არ არსებობს” – სტენდალი

სიგარეტისთვის თავის დანებებაზე იოლი არაფერია, დამიჯერეთ, მე უკვე 30–ჯერ მაინც დავანებე” – მარკ ტვენი

მე უარი ვთქვი მონაწილეობა მიმეღო მის დასაფლავებაში, მაგრამ გავაგზავნე წერილი, რომელშიც მივესალმე ამ ღონისძიებას” – მარკ ტვენი

არაფერია იმაზე მეტად გამაღიზიანებელი ვიდრე კარგი მაგალითი” – მარკ ტვენი

მარკ ტვენი

შესანიშნავი გზა გაიფუჭო ადამიანთან ურთიერთობა – უთხრა: “არა, თქვენ არასწორად ყვებით ამ ანეკდოტს” და შემდეგ მოყვე შენებურად” – მარკ ტვენი

უმჯობესია ჩუმად იყო და ხალხს დებილი ეგონო, ვიდრე პირი გააღო და გააქარწყლო ყველა ეჭვი” – მარკ ტვენი

ბედნიერი იყო ადამი! თუ შეეძლო რამის კარგად თქმა, დარწმუნებული შეიძლება ყოფილიყო, რომ მან ეს პირველმა თქვა” – მარკ ტვენი

მარკ ტვენი ჩემი საყვარელი მწერალია, სამი მიზეზის გამო: ის კარგად წერდა, ის მე მართობდა და ის უკვე მკვდარია” – ერნესტ ჰემინგუეი

ადამიანს სჭირდება 2 წელი რომ იწავლოს ლაპარაკი და 50 რომ ისწავლოს გაჩუმება” – ერნესტ ჰემინგუეი

თუ არ შეგიძლიათ დაუმტკიცოთ – დააბნიეთ” – ჰარი ტრუმენი

ცენზურა – რეკლამა სახელმწიფოს ხარჯზე” – ფედერიკო ფელინი

ბობი ფიშერი

“ჩემი პარტია ღმერთთან ალბათ ფრედ დამთავრდებოდა” – ბობი ფიშერი

სამი კარგად შეინახავს საიდუმლოს, თუ ორი მათგანი მკვდარია” – ბენჟამინ ფრანკლინი

ამ სამყაროში ორი რამ არის გარდაუვალი – სიკვდილი და გადასახადები” – ბენჟამინ ფრანკლინი

არავის მისცეთ თქვენი წიგნები, თორემ მათ ვერასდროს ნახავთ. ჩემ ბიბლიოთეკაში მარტო ის წიგნები დარჩა, რომლებიც სხვებს გამოვარტვი წასაკითხად” – ანატოლ ფრანსი

ხანდახან სიგარა მხოლოდ სიგარაა” – ზიგმუნდ ფროიდი

“მე ფროიდი დამესიზმრა. რას უნდა ნიშნავდეს?” – სტანისლავ ლეცი

ზიგმუნდ ფროიდი

საკუთარი ძაღლისთვის ყველა ჩვენთაგანი ნაპოლეონია. აი რატომ უყვართ ძაღლები” – ოლდოს ჰაქსლი

არ ვიცი რატომ ლანძღავენ მთავრობას…ის ხომ არაფერს აკეთებს” – ბობ ჰოუპი

თუ სანთლები დაბადების დღის ტორტში უფრო ძვირი დაგიჯდათ, ვიდრე თვითონ ტორტი, ესე იგი სიბერე ახლოსაა” – ბობ ჰოუპი

დემოკრატია – მმართველობის ყველაზე ცუდი ფორმა, თუ არ ჩავთვლით ყველა დანარჩენს” – უინსტონ ჩერჩილი

“უკეთესია საშინელი დასარული, ვიდრე საშინელება დასასრულის გარეშე” – ფრიდრიხ შილერი

არ ეცადოთ იცხოვროთ მუდამ, თქვენ არაფერი გამოგივათ” – ბერნარდ შოუ

უთხარი მას რომ ცაზე 9543234546364523 ვარსკვლავია და ის დაგიჯერებს, მაგრამ უთხარი მას რომ ეს სკამი ამ წამს იქნა შეღებილი და ის აუცილებლად შეეხება მას თითით” – ბერნარდ შოუ

მხოლოდ ორი რამ არის უსასრულო: სამყარო და სისულელე. თუმცა სამყაროს შესახებ დარწმუნებული არ ვარ” – ალბერტ აინშტაინი

ალბერტ აინშტაინი

Advertisements

ათეიზმი – აროგანტული რწმენა რომ მთელი მილიარდ–გალაქტიკიანი სამყარო მხოლოდ ჩვენთვის არ შექმნილა

საფეხბურთო გამოთქმებისა არ იყოს, აქვე წარმოგიდგენთ გამოთქმებს რელიგიის და ათეიზმის შესახებ. ბევრ ლაპარაკს არ დავიწყებ არც ერთზე და არც მეორეზე, ვინც ათეისტია იმან ისედაც ყველაფერი იცის, ხოლო ვინც მორწმუნეა იმას მაინც ვერაფერს დაუმტკიცებ, ასე რომ აზრს ვერ ვხედავ. მიუხედავად ამისა მომავალში შესაძლოა ჩემი რამოდენიმე მოსაზრება კი გამოვაქვეყნო, მაგრამ იქამდე უბრალოდ წარსულის და აწმყოს მოაზროვნეთა გამონათქვამებით დავკმაყოფილდეთ, რომელთაგანაც ზოგი ამავე დროს სასაცილოც არის, ზოგი კი სერიოზული. მაშ ასე, დავიწყოთ:

თუ ათეიზმი რელიგიაა, მაშინ ჯანმრთელობა ავადმყოფობაა” – კლარკ ადამსი.

როგორ უნდა მწამდეს ღმერთის, როცა ჯერ კიდე წინა კვირას საწერ მანქანაში ენა გამეჭედა” – ვუდი ალენი

მე არ მეშინია სიკვდილის, უბრალოდ არ მინდა იქ ვიყო როცა ეს მოხდება” – ვუდი ალენი

…ნეტავ ღმერთს რამე ნიშანი მოეცა, მაგალითად დიდი თანხა დაესვა ჩემს ანგარიშზე შვეიცარულ ბანკში“– ვუდი ალენი

გენიოსი – ვუდი ალენი

შენთვის მე ათეისტი ვარ, ღმერთისთვის კი ლოიალური ოპოზიცია” – ვუდი ალენი

იქნებ ეს ყველაფერი არ არსებობს და ილუზიაა? ამ შემთხვევაში აშკარად ზედმეტი გადავიხადე ჩემს ხალიჩაში” – ვუდი ალენი

მე ერთხელ მინდოდა გავმხდარიყავი ათეისტი, მაგრამ ვერ შევძელი, რადგან მათ დღესასწაულები არ აქვთ” – ჰენრი იუნგმანი

ერთადერთი რაზეც არ ვნერვიულობ არის ის, არსებობს თუ არა ღმერთი, მაგრამ მივხვდი, რომ ღმერთს ალცჰაიმერის დაავადება სჭირს და დაავიწყდა, რომ ჩვენ ვარსებობთ” – ჯეინ ვაგნერი.

იცხოვრე კარგად. თუ ღმერთები არიან და არიან სამართლიანნი, მაშინ მათ არ უნდა აინტერესებდეთ რამდენად ღვთისმოშიში იყავი, არამედ მხოლოდ ის რამდენად ღირსეულად იცხოვრე. თუ არიან ღმერთები და ისინი უსამართლონი არიან, მაშინ არ უნდა გსურდეს მათი თაყვანისცემა. თუ ღმერთები არ არიან, მაშინ შენ უბრალოდ გაქრები, მაგრამ გექნება კეთილშობილურად ნაცხოვრები და იარსებებ შენი საყვარელი ადამიანების მოგონებებში. მე არ მეშინია”.  – მარკუს ავრელიუსი

ბნელი წლების მიერ დატოვებული ხვრელი

ყველა ბიბლიური სასწაული თანდათან გაქრება მეცნიერების განვითარებასთან ერთად” – მეტიუ არნოლდი

სასწაულები არ ხდება” – მეტიუ არნოლდი

აიზეკ აზიმოვი

მე არ მაქვს დამამტკიცებელი საბუთი, რომ ღმერთი არ არსებობს, მაგრამ იმდენად დიდი ეჭვი მაქვს რომ არ არსებობს, რომ არ მინდა ამაზე დროის დაკარგვა” – აიზეკ აზიმოვი

მე არ მჯერა სიკვდილის შემდეგ სიცოცხლის, ამიტომ არ მჭირდება გავატარო მთელი ჩემი ცხოვრება ჯოჯოხეთის და მითუმეტეს სამოთხის შიშში. როგორი წამების საშუალებებიც არ უნდა იყოს ჯოჯოხეთში, სამოთხის მოწყენილობა მაგაზე უარესი იქნება”. – აიზეკ აზიმოვი

რელიგიურ ადამიანთან კონტაქტში შესვლის შემდეგ, ყოველთვის მაქვს შეგრძნება რომ ხელი უნდა დავიბანო” – ფრიდრიხ ნიცშე.

მე ვერ დავიჯერებ ღმერთის, რომელსაც უნდა რომ სულ ადიდებდნენ” – ფრიდრიხ ნიცშე

ღმერთის რწმენა შეუძლებელია – ღმერთის არრწმენა აბსურდი”. – ვოლტერი

ჩვენ ორივე ათეისტები ვართ. უბრალოდ მე ერთით ნაკლები ღმერთის მწამს ვიდრე შენ. როდესაც შენ მიხვდები რატომ უარყოფ ყველა სხვა შესაძლო ღმერთს, მაშინ მიხვდები რატომ ვუარყოფ მე შენსას“.  – სტივენ რობერტსი

ბიბლიის დაკვირვებით კითხვა და მისი გაგება, არის პირდაპირი გზა ათეიზმისკენ”.  – დონალდ მორგანი

ჯორჯ კარლინი

“ათეიზმი არამომგებიანი ორგანიზაციაა” – ჯორჯ კარლინი

ჯორჯ ორუელი

ის გაბრაზებული ათეისტი იყო, ისეთი ათეისტი, რომელსაც იმდენაც ღმერთის კი არ სწამს, არამედ პირადად არ მოსწონს ის” – ჯორჯ ორუელი

ბიბლია პასუხისმგებელია უფრო მეტ ათეიზმზე, აგნოსტიციზმზე, ურწმუნოებაზე – რაც გსურთ ის უწოდეთ – ვიდრე აქამდე დაწერილი ყველა წიგნი ერთად აღებული“. – ალან ალექსანდრ მილნი.

მე მომწონს ძაღლი (dog) იქამდე, სანამ მას უკუღმა (god) არ წერენ”. – გილბერტ კეიტ ჩესტერტონი.

რა თქმა უნდა კიდევ უამრავი ჭკვიანი ან არც ისე ჭკვიანი ადამიანის გამოთქმა არსებობს, მაგრამ ამჯერად მხოლოდ ეს მომეპოვებოდა ჩემი მყარი დისკების უკიდეგანო სივრცეში, ხოლო სხვა გამოთქმების მოძეიბა სიმართლე გითხრათ დამეზარა 🙂

ლოცვა – აკეთებდე არაფერს და ფიქრობდე რომ ეხმარები

უმარტივესი გადაწყვეტილება ხშირად ყველაზე მოხერხებულია, მაგრამ ამავე დროს ისინი ხშირად მცდარია

ქვემოთ წარმოგიდგენთ სასაცილო საფეხბურთო გამოთქმებს, რომლებიც მოძიებულია ჩემს მიერ ინტერნეტში. მათი ნაწილი ყველასთვის გასაგები და ვფიქრობ სასაცილო იქნება, იმათთვისაც კი ვინც ფეხბურთში საერთოდ ვერ ერკვევა, მაგრამ ის მაინც იცის, რომ მას 22 კაცი თამაშობს ერთი ბურთით… ზოგი კი, ალბათ მხოლოდ ფეხბურთში ასე თუ ისე ჩახედული პიროვნებისთვის იქნება გასაგები. ასეთი გამონათქვამებისთვის კომენტარებს გავაკეთებ, “ჩაინიკებისთვის” 🙂

მოკლედ ბევრი და უაზრო ლაპარაკის გარეშე, პირდაპირ საქმეზე გადავიდეთ:

“წარუმატებლად მოეზმადეთ? – მოემზადეთ წარუმატებლობისთვის” – ალან შირერი.

ნუ ეს სასაცილო იმდენად არაა, რამდენადაც ფილოსოფიურობაზე პრეტენზიის მქონე გამოთქმა.

ადამიანს, რომელიც ამბობს, რომ გამარჯვება ყველაფერი არაა, არასდროს არაფერი მოუგია” – მია ჰემი (ამერიკელი ქალი ფეხბურთელი)

ფეხბურთის წესები ძალიან მარტივია: თუ რამე მოძრაობს დაარტყი, თუ არ მოძრაობს – ურტყი იქამდე სანამ არ ამოძრავდება” 🙂  – ფილ ვუსმენი

ფეხბურთში ყველაფერი გართულებულია მოწინააღმდეგე გუნდის არსებობის გამო” – ჟან პოლ სარტრი

ზოგი ამბობს, რომ ფეხბურთი სიკვდილ–სიცოცხლის საკითხია… რა სისულელეა, ის ამაზე გაცილებით მეტია 🙂 ” – ბილ შენკლი

ფეხბურთი არის ძალიან კარგი უხეში გოგონებისთვის, მაგრამ არა დელიკატური ბიჭებისთვის” – ოსკარ უაილდი

იტალიელები ვერ მოგიგებენ თამაშს, მაგრამ შენ შეიძლება წააგო მათთან” – იოჰან კრუიფი

ვისაც ერთხელ მაინც სმენია იტალიელების თამაშის მანერაზე, ყველაფერს მიხვდებოდა 🙂

“ხუთი დღე სამუშაოსთვისაა – როგორც ბიბლიაში წერია, მეშვიდე დღე ღმერთისაა, მეექვსე კი ფეხბურთის” – ენტონი ბერჯისი

ჩვენ წავაგეთ, იმიტომ რომ ვერ მოვიგეთ” 🙂 – რონალდო

როდესაც საქმე არ მაქვს, ჩემპიონატის ცხრილის ბოლოში ვიყურები, რომ ვნახო “ევერტონი” რას შვება” –  ბილ შენკლი 🙂

ბილ შენკლი იყო “ლივერპულის” ლეგენდალური მწვრთნელი, ხოლო “ევერტონი” ასევე ქალაქ ლივერპულის გუნდია და “ლივერპულის” მოსისხლე და პირველი მტერია.

ამ ქალაქს ორი დიდი გუნდი ჰყავს: “ლივერპული” და “ლივერპულის” რეზერვები” 🙂 – ბილ შენკლი

მოგეხსენებათ ყველა გუნდს ყავს მეორე გუნდი, ე.წ. “რეზერვები” სადაც ძირითადად ახალგაზრდები თამაშობენ.

“მადრიდის რეალის გაგონებაზეც კი ღებინება მინდება” – ხრისტო სტოიჩკოვი

“ბარსელონას” ლეგენდარული ბულგარელი ფეხბურთელი. მგონი ყველაფერი გასაგებია 🙂

თავისი ცხოვრების მანძილზე კაცმა შეიძლება შეიცვალოს ცოლი, პოლიტიკური პარტია, ან რელიგია, მაგრამ ის ვერასდროს შეიცვლის საყვარელ საფეხბურთო გუნდს” – ედუარდო გალეანო

საერთაშორისო (სანაკრებო) ფეხბურთი არის ომის გაგრძელება, უბრალოდ სხვა საშუალებებით” – ჯორჯ ორუელი

არაა აუცილებელი იყო კარგი ცხენი, რომ შემდეგ გახდე ჟოკეი” – არიგო საკი

იგულისხმება რომ არაა აუცილებელი იყო ფეხბურთელი, რომ შემდეგ გახდე მწვრთნელი. თვითონ არიგო საკის ფეხბურთი არასდროს უთამაშია.

“ყველაფერი, რაც მე ვიცი კაცის მორალურობაზე და პასუხისმგებლობაზე, ვიცი ფეხბურთიდან” – ალბერ კამიუ

სამოთხეში პირველივე ვარჯიშის დროს, ჯორჯ ბესტმა თავბრუ დაახვია თავის მარჯვენა ფლანგზე ღმერთს, რომელიც მარცხენა მცველი იყო… ძალიან მინდა რომ ადგილი შემინახოს თავის გუნდში… ჯორჯ ბესტმა რა თქმა უნდა და არა ღმერთმა” 🙂 – ერიკ კანტონა

საუკეთესო მომენტი ჩემს კარიერაში? – ეგეთი ბევრი მქონდა, მაგრამ ყველაზე უკეთ მაინც ის მახსენდება იმ ტიპს რომ წიხლი ჩავარტყი ტრიბუნაზე” – ერიკ კანტონა

ისე ერთხელ კანტონა, როდესაც 19 წლის იყო, თამაშის შემდეგ მოწინააღმდეგე გუნდის 7 ფეხბურთელს ეცა საჩხუბრად… 3 საავადმყოფოში მოხვდა, 4 კი გაექცა 🙂

1969 წელს მე თავი დავანებე ქალებს და ალკოჰოლს… ეს იყო ყველაზე შაშინელი 20 წუთი ჩემს ცხოვრებაში” – ჯორჯ ბესტი

მე ერთხელ ვუთხარი” გაზზას” (პოლ გასკოინი), რომ მისი IQ იმაზე დაბალი იყო, ვიდრე ნომერი მის მაისურზე, მან კი მკითხა: რა არის IQ?” – ჯორჯ ბესტი

მე არ ვსვამ, მაგრამ მხოლოდ მაშინ როცა მძინავს” – ჯორჯ ბესტი

და ბოლოს ჩემი პირადი ფავორიტი

ათეისტის გლაზგოური დეფინიცია: ტიპი, რომელიც მიდის “რეინჯერს” – “სელტიკის” თამაშზე, რათა უყუროს ფეხბურთს” 🙂

ვინც ვერ მიხვდა განვმარტავ: “რეინჯერსი” და “სელტიკი” ორივე გლაზგოს გუნდია, რომელთაგანაც პირველს გულშემატკივრობენ პროტესტანტები, მეორეს კი კათოლიკები (“სელტიკი” ირლანდიელების დაარსებულია, რაზეც სახელიც მეტყველებს). მათი დაპირისპირება იმდენად სერიოზულია, რომ 1980–იანი წლების ბოლომდე არც ერთ კათოლიკს არ უთამაშია “რეინჯერსში” და პირიქით პროტესტანტს “სელტიკში”. ხოლო როდესაც პირველი ასეთი “ვაჟკაცი” გამოჩნდა, თანაც უცხოელი, მას სახლი დაუწვეს… საკუთარმა გულშემატკივრებმა 🙂

იმედია მოგეწონათ და ერთხელ მაინც გაგეცინათ 🙂

p.s. ზოგს ალბათ მხოლოდ პირველი და ბოლო სურათი მოეწონა, მაგრამ ეგეც საქმეა 🙂

ჩემი კომპიუტერის უკიდეგანო სივრცეებში ქექვისას, შემთხვევით წავაწყდი “ფოლდერს”, რომლის არსებობაც მივიწყებული მქონდა. იქიდან გამომდინარე, რომ საკმაოდ მაინტერესებს კოსმოსი და ყველაფერი მის გარშემო, გადავწყვიტე დამეწერა ეს “პოსტი”, იმ “ფოლდერში” მყოფი სურათების დახმარებით (რომლებზეც ძირითადად პლანეტები და ვარსკვლავებია ერთმანეთთან შედარებული ზომების მიხედვით). რა თქმა უნდა ეს ყველაფერი არის სამოყვარულო დონის ინფორმაცია, ასე ვთქვათ ზედაპირული ცოდნა და არანაირი პრეტენზია არ აქვს, რომ იყოს რაიმე სახის მეცნიერული ნამუშევარი :), თუმცა მიუხედავად ამისა მგონი საინტერესოა ყველასთვის, იმათთვის ვინც საერთოდ ვერ ერკვევა ამ საკითხებში და იმათთვისაც ვინც ჩემსავით მოყვარულია.

მოკლედ ბევრი რომ არ ვილაპარაკო, პირდაპირ დავიწყოთ სურათებით და მათი განხილვით.

დავიწყოთ პირველი სურათით, სადაც წარმოდგენილია ჩვენი მზის სისტემის პირველი 4, ეგრეთწოდებული “მძიმე” პლანეტა, მთვარე და რამდენიმე ჯუჯა პლანეტა, მათ შორის პლუტონიც (მოგეხსენებათ მას პლანეტობა 2006 წელს “ჩამოერთვა”).

მზის სისტემის პირველ ოთხი პლანეტა შედგება ძირითადად ლითონებისგან, სწორედ ამიტომ არიან ისინი მზესთან უფრო ახლოს განლაგებული, ვიდრე ე.წ. “გაზის გიგანტები”.

ვენერა სინამდვილეში წითელი ფერის არის, ფილმებში კი თეთრად იმიტომ არის ნაჩვენები, რომ მას გარს საკმაოდ სქელი ღრუბლები აკრავს. ტემპერატურა მის ზედაპირზე 470 გრადუსს აღწევს ცელსიუსით. “ვენერა” ყველა სხვა პლანეტებისგან განსხვავებული მიმართულებით ბრუნავს თავისი ღერძის გარშემო, მეცნიერები ვარაუდობენ, რომ ეს გამოწვეულია დიდი ასტეროიდის შეჯახებით, რომელმაც პლანეტას ღერძის გარშემო ბრუნვის მიმართულება შეაცვლევინა.

მზე, დაახლოებით 5 მილიარდი წლის შემდეგ, როდესაც მთელ თავის “საწვავს” ამოწურავს და აფეთქდება, “თეთრ ჯუჯად” გადაიქცევა.

გადავიდეთ მეორე სურათზე სადაც “სცენაზე გამოდიან” ე.წ. “გაზის გიგანტები”: იუპიტერი, სატურნი, ნეპტუნი და ურანი.

ეს პლანეტები უმეტესად (80 პროცენტზე მეტი) წყალბადისგან შედგებიან. მათ მკვრივი ზედაპირი არ გააჩნიათ, ამიტომაც მოიხსენიებიან ისინი გაზურ გიგანტებად. სწორედ იუპიტერის დამსახურებაა ის, რომ დედამიწას არ ეცემა კომეტები და ასტეროიდები, რადგან თავისი გრავიტაციის გამო სწორედ ის იზიდავს მათ და არ უშვებს ჩვენსკენ.

მესამე სურათი: მზე.

მზე არის “წითელი ჯუჯის” კატეგორიის ვარსკვლავი, რომელიც მიუხედავად თავისი “ჯუჯობისა” მაინც 109–ჯერ დიდია დედამიწაზე. მზე არის ჩვენი მზის სისტემის ფორმირებისა და დედამიწაზე სიცოცხლის გაჩენა–არსებობის მიზეზი. საერთოდ სამყაროს შექმნის შემდგომ პერიოდში, სწორედ ვარსკვლავებში (მათ ბირთვში) მიმდინარე პროცესების შედეგად წარმოიქმნა იმ ნივთიერებების უმეტესობა, რომელიც დღეს ჩვენ გვხვდება ხილულ სამყაროში. ასე რომ თავისუფლად შეგვიძლია ვარსკვლავებს ვუწოდოთ დიდი საწარმოები, რომლებმაც შექმნეს ორგანული ნოვთიერებები. მარტო ჩვენ გალაქტიკაში დაახლოებით 400 მილიარდი ვარსკვლავია, ანუ 400 მილიარდი მზე, რომელთაც ყველას შესაძლოა თავისი პლანეტები ჰქონდეს…

თუმცა მიუხედავად იმისა რომ ვარსკვლავები არიან სიცოცხლის წარმოშობის პირველი მიზეზი, ისინი ასევე მისი განადგურების მიზეზიც შესაძლოა გახდნენ. ვარსკვლავი აფეთქების შედეგად იმხელა ენერგიას  და რადიაციას გამოყოფს, რაც საკმარისია დედამიწაზე ყველანაირი ცოცხალი არსების გასანადგურბლად. მზის კატეგორიის ვარსკვლავების სიცოცხლის ხანგრძლივობა საშუალოდ 10 მილიარდი წლით განისაზღვრება, იქიდან 5 ჩვენმა მზემ უკვე გალია, კიდევ 5 მილიარდის შემდეგ კი მზე, კვდომის პროცესში გადაიქცევა “წითელ გიგანტად”, მისი ზომა გაიზრდება, ის შთანთქავს მერკურის და ვენერას, მაქსიმალურად მოუახლოვდება დედამიწას, სადაც ტემპერატურა ისე მოიმატებს, რომ ვერანაირი ცოცხალი არსება ვერ იარსებებს მსგავს პირობებში, ამის შემდეგ კი მოხდება აფეთქება, მთელი ნარჩენი ენერგია გაიფრქვევა კოსმოსში, ხოლო მზე გადაიქცევა “თეთრ ჯუჯად” და ასეთ მდგომარეობაში მილიარდობით წლები დარჩება.

მზის ბირთვიდან გამოტყორცნილი ენერგია კი უკვალოდ არ დაიკარგება და ის ხელს შეუწყობს შემდგომში ახალი ვარსკვლავის ფორმირებას.

სურათი 4: ბრწყინვალე ვარსკვლავები

“სირიუსი” არის ყველაზე ბრწყინვალე ვარსკვლავი, მისი გამოსხივება იმდენად მკვეთრია რომ თავისუფლად შეიძლება შეუიარარებელი თვალით დანახვა. “არქტურუსი” ბრწყინვალებით 4–ე ადგილზე იმყოფება, რაც საკმაოდ აადვილებს ცაზე მის პოვნას. თუ მისი დანახვა შეუიარაღებელი თვალით გსურთ, უბრალოდ “დიდი დათვის” თანავარსვკლავედის პირველ სამ ვარკვლავს (ე.წ. “კოვზის ხელის მოსაკიდს”) გააყოლეთ თვალი და გაყევით მაგ ხაზს.

სურათი 5: წითელი სუპერგიგანტები

“ბეთელჰეიზი” და “ანტარესი” განეკუთვნებიან “წითელი სუპერგიგანტების” კატეგორიას. ამ ვარსკვლავების სიცოცხლის ციკლი, მათი დიდი მასიდან გამომდინარე არც თუ ისე დიდია, სულ რამოდენიმე მილიონი წელიწადი, რის შემდეგაც ხდება მათი აფეთქება, ეგრეთ წოდებული ” სუპერნოვა” ანუ “ზეახალი ვარსკვლავი”. აფეთქების შედეგად ვარსკვლავის ბირთვიდან გამოიტყორცნება უსაზგვრო რაოდენობის ენერია, რომლის სიჩქარეც დაახლებით 20000 კმ/წ არის. აფეთქების ცენტრში, ვარსკვლავის ადგილას რჩება პატარა ციური სხეული, “პულსარი”, რომელიც შეუჩერებლად მოძრაობს თავისი ღერძის გარშემო წარმოუდგენელი სიჩქარით: 1100 ბრუნი წამში.

თუმცა შესაძლოა პულსარის მაგივრად დარჩეს სხვა რამ… ამაზე ცოტა მოგვიენებით, როცა “ჰიპერგიგანტებს” მივადგებით.

“სუპერნოვა” ანუ “ზეახალი ვარსკვლავი” შთამბეჭდავი და ლამაზი სანახაობაა, რომელიც სამწუხაროდ კაცობრიობას საკუთარი თვალით ჯერ არ დაუნახავს, თუმცა ჩვენ შეგვიძლია ვუყუროთ სუპერნოვას შედეგებს, ვარსკვლავის აფეთქების შედეგად გამოდევნილი ენერგია და ნივთიერებები, ლამაზ, დიდ და შთამბეჭდავ ნისლეულს ქმნიან, ხოლო ქარის არარსებობის პირობებში, ეს ნისლეული საუკუნეების მანძილზე არ გაიფანტება. “ზეახალი ვარსკვლავის” ერთ–ერთი ყველაზე ცნობილი მაგალითია  “კიბორჩხალისებრი ნისლეული” ინგლისურად : “crab nebula”.

N:6 ჰიპერგიგანტები

“პისტოლეტის ვარსკვლავმა” სახელი მიიღო ნისლეულის გამო, რომელიც მას გარს აკრავს, რადგან ნისლეული პისტოლეტის ფორმის არის. ის იმდენად კაშკაშა ვარსკვლავია, რომ მისი დანახვა თავისუფლად უნდა შეიძლებოდეს, მაგრამ სწორედ ნისლეულის გამო ეს ჩვეულებრივი ტელესკოპით შეუძლებელია, ამისთვის ინფრაწითელი ტელესკოპია საჭირო.

N7 : უდიდესი ვარსკვლავები

“ვვ ცეფეი” არის ერთ–ერთი უდიდესი ვარსკვლავი, რომელიც ჯერჯერობით არის აღმოჩენილი, ის დაახლოებით 1600–1900–ჯერ დიდია მზეზე, მისი გარშემოწერილობა კი დაახლეობით 2,227,200,000 კმ–დან 2,644,800,000 კმ–მდე არის.  თუმცა ასტრონომებს არ აქვთ ჩამოყალიბებული შეხედულება რომელია უდიდესი (ზომით) ვარსკვლავი, “ვვ ცეფეი”, თუ “VY Canis Majoris” ანუ “დიდი ძაღლის VY”, ვარსკვლავი “დიდი ძაღლის” თანავარსკვლავედში. ის მზეზე დაახელოებით 1800–2100–ჯერ დიდია. სწორედ ზუსტი ზომების არცოდნა არის მიზეზი იმისა, რომ ჩვენთვის უცნობია რომელი ვარსკვლავია უფრო დიდი, თუმცა ამას მგონი გადამწყვეტი მნიშვნელობა არ უნდა ჰქონდეს. ბოლოს და ბოლოს შესაძლოა რამოდენიმე წელიწადში აღმოვაჩინოთ ვარსკვლავი, რომელიც მზეზე 3000–ჯერ დიდი იქნება და ის უკონკურენციო პირველადგილოსანი იქნება.

იმისთვის, რომ წარმოიდგინოთ რამხელაა VY Canis Majoris შემდეგ მაგალითს მოგიყვანთ: მას რომ მკვრივი ზედაპირი გააჩნდეს, ადამინი ფეხით ერთი სრული წრის დარტყმას 850 000 წელს მოანდომებდა.

როგორც ადრე მოგახსენეთ, გიგანტური ვარსკვლავების აფეთქების შედეგად წარმოიქმენბა ეგრეთ ოდებული “ზეახალი ვარსკვლავი”, მაგრამ არაფერი გვითქვამს მეორე შესაძლებობაზე: “შავი ხვრელი” – ყველაზე მისტიკური და ამოუცნობი მოვლენა მთელს სამყაროში.

გიგანტური ვარსკვლავი თავისი არსებობის ბოლო პერიოდში, როდესაც მთელ თავის ენერგიას ამოწურავს, იწყებს შეკუმშვას და მთელი თავისი მასით აწვება ვარსკვლავის ცენტრს, რის შემდეგაც ვარსკვლავი კოლაფსირებს და წარმოიქმენბა “შავი ხვრელი”.

რამდენადაც ცნობილია, “შავ ხვრელში” არ არის არც მატერია, არც დრო და არც სივრცე. ყველანაირი ობიექტი, რომელიც მასთან ახლოს მივა, იქნება შთანთქმული მის მიერ და გაქრება, ოღონდ არავინ იცის სად. უამრავი თეორია არსებობს “შავ ხვრელებთან” დაკავშირებით, რომელთაგანაც ჯერ არცერთი დადასტურებულა. ფაქტი მხოლოდ ერთია, მისი დანახვა შეუძლებელია, რადგან მისი მიზიდულობის ძალა იმდენად დიდია, რომ ის სხივსაც კი შთანთქავს, რაც მას “აბსოლუტურად შავს” და უხილავს ხდის. შავი ხვრელი მასზე დაცემულ სხივს კი არ ირეკლავს, არამედ გარდატეხს მას და ისიც მისი ცენტრიდან რგოლისკენ მიემართება, რის გამოც სპექტრი მის გარშემო ბუნდოვანი ხდება. არსებობს მხოლოდ ორი გზა დედამიწიდან მისი დანახვის:

1. როდესაც ის რომელიმე ციურ ობიექტს შთანთქავს

ან

2. როდესაც ის ამოეფარება და დაფარავს მხედველობის არედან რომელიმე ვარსკვლავს. თუმცა ეს მოვლენა იმდენად წამიერად ხდება, რომ ძალზედ ძნელი შესამჩნევია.

მხოლოდ ჩვენს გალაქტიკაში შესაძლოა მილიონობით შავი ხვრელი იყოს, მაგრამ იმის გამო რომ მათი დანახვა ძალზედ ძნელია, მათი რაოდენობის ზუსტი განსაზღვრა საკმაოდ რთულია, თუმცა თეორიულად და ლოგიკურად თუ მივუდგებით საკითხს, გასული მილიარდი წლების მანძილზე სავსებით შესაძლებელია, რომ მილიონი “შავი ხვრელი” იყოს წარმოქმნილი ჩვენს გალაქტიკაში.

არსებობს თეორია რომლის თანახმადაც, სულ ბოლოს, სამყაროში მხოლოდ შავი ხველები დარჩება და ყველანაირი მატერია განადგურებული იქნება.

N8 გალაქტიკა.

ალბათ ყველამ იცით ეს რაც არის, ეს არის ჩვენი მშობლიური გალაქტიკა, “ირმის ნახტომი”. ამ სურათს ქვემოთ მინაწერი აქვს, ვინც ინგლისური არ იცის, იმას ვეტყვი მის შინაარსს: “ამ სურათის მიხედვით, “ვვ ცეფეი” არის ერთ პიქსელზე 1689794–ჯერ პატარა.

ჩვენი გალაქტიკის ასაკი დაახელობით იმდენია, რამდენიც არის თვითონ სამყაროსი. ყველაზე ძველი ვარსკვლავის ასაკი ჩვენს გალაქტიკაში არის 13,2 მილიარდი წელიწადი. როგორც უკვე გითხარით ჩვენს გალაქტიკაში დაახლოებით 200–დან 400 მილიარდამდე ვარსკვლავია, ხოლო თვითონ გალაქტიკა ხილვად სამყაროში – დაახლოებით 100 მილიარდი. ყველა გალაქტიკის ცენტრში, მეცნიერების მოსაზრების თანახმად არის “ზემასიური შავი ხვრელი”, რომლის გრავიტაციაც ამოძრავებს თავის გარშემო ვარსკვლავებს.

ჩვენი გალაქტიკა იმდენად დიდია, რომ ახლაც კი, ჩვენი ტექნიკის პირობებში, ჩვენ მხოლოდ მის ცენტრამდე შეგვიძლია მისი გამოკვლევა. მიუხედავად იმისა რომ ჩვენი მზის სისტემა მდებარეობს გალაქტიკის უკიდურეს საზღვარზე, იმისთვის რომ გამოვაღწიოთ ირმის ნახტომიდან, დაგვჭირდება დაახლოებით 10 000 წელიწადი, გალაქტიკის ცენტრში მისაღწევად კი 25 000 წელიწადი, სინათლის სხივის სიჩქარით მოძრაობის პირობებში. სინათლის სხივის სიჩქარე კი მოგეხსენებათ 300 000 კმ/წამში არის. ასე რომ კაცობრიობას არასდროს ექნება შანსი, რომ თუნდაც ჩვენი გალაქტიკის ცენტრამდე მიაღწიოს რაიმე სახის კოსმოსური ხომადლით.

მოდით ძალიან რომ არ დაგღალოთ, ამჟამად ამით დავკმაყოფილდეთ, ხოლო უახლოეს მომავალში, თუ დაგაინტერესებთ, მოგიყვებით:

ყველაზე დიდი და დამანგრეველი ძალის მქონე ობიექტების: “კვაზარების”, იგივე “ზე მასიური შავი ხვრელების” შესახებ;

მთლიანად ჩვენი სამყაროს, მისი წარმოშობის, განვითარების და შესაძლო მომავლის თაობაზე;

მზის სისტემს შექმნის და რაც მთავარია, დღეს ასე აქტუალური და მისტიკური საკითხის: შავი მატერიის და შავი მასის შესახებ…

ძალზედ ბევრი გენიოსი გვყავს ამ ქვეყანაში, იმდენად ბევრი რომ თვლასაც ვერ აუდივართ…

ერთ–ერთო მათგანია ის ადამიანი ვინც მოიფიქრა ტელეკომპანია “იმედზე” “მომავის ქრონიკის” გაკეთება…

ეს რეპორტაჟი უმეტესობამ ან ნახა, ან კიდევ მისმა მეგობრებმა, ნათესავებმა, მშობლემა იხილეს, დაურეკეს და შეატყობინეს, რომ ომი დაიწყო… პირადად მე დედაჩემმა დამირეკა და როდესაც მითხრა, რუსეთი შემოვიდაო, ვერ ვიჯერებდი: “კი მაგრამ, ესე უბრალოდ როგორ შემოვიდა?! აშკარად არაფერი მოასწავებდა ამას, არც დაძაბულობა იყო…” ლიტერატურულ კაფესთან ვიყავი და შიგნით წყნარად მსხდომი, რატი ამაღლოებლი და ლაშა ბუღაძე დავინახე, რომლებიც 5 წუთში გამოვიდნენ იქიდან და ჩქარი ნაბიჯით გაემართნენ სადღაც, შემდეგ კი რადიო ჩავრთე, “იმედზე” გადავრთე და მოვუსმინე, მთელი მსოფლიო მუნდიალის დაწყბას ზეიმობსო, ცოტა კი დავიბენი, რა მუნდიალის, რის მუნდიალისთქო…

სახლში როცა მოვედი, ავდექი და  ვუყურე გადაცემას და ყურების დროს შევნიშნე რამდენიმე მომენტი, რომელზეც რატომღაც ყურადღება გავამახვილე:

1. ის რაც ყველამ შენიშნა: გადაცემას არსად ეწერა რაიმე განმასხვავებელი ნიშანი ჩვეულებრივი ქრონიკისგან, რაც ცოტა უცნაურია, რადგან არქივის სიუჟეტსაც კი აწერია დიდად “არქივი”, არადა სულ რაღაც 2 წუთით ადრე არის ნათქვამი რომ არქივია, ხოლო ეს გადაცემა კი მთელი ნახევარი საათი გრძელდებოდა და ერთხელაც კი არ გამოჩნდა, რომ უბრალოდ იმიტაცია იყო.

2. თუ დააკვირდით, ერთი მომენტი იყო, რამოდენიმე წამიანი: როდესაც ლაპარაკი იყო თბილისთან მიმდინარე ბრძოლებზე, გამოჩნდა სროლის კადრი, სადაც უამრავი ტყვია თუ ჭურვი იყო. კადრებში ღამე იყო, ზუსტად ისევე როგორც რეალურად მაგ დროს…

3. გადაცემაში სულ რამოდენიმეჯერ იყო ნახსენები ის, რომ გადაცემის გასვლის დროს იყო ზაფხული, ერთხელ “მუნდიალის” ხსენების დროს და მეორე უფრო ადრე, როდესაც თქვეს რომ რაღაც მოხდა 3 დღით ადრე, 7 ივნისს…

ასე რომ ფაქტია: იმათთვის ვინც ამ გადაცემას თავიდანვე არ უყურა, რეპორტაჟი იყო ძალზედ დამაჯერებელი და რეალური, ასე რომ პანიკა მოსახლეობაში სრულიად ბუნებრივია.

რეპორტაჟის მსვლელობისას ვიზუალური მინიშნების არარსებობა იმ ფაქტზე, რომ ეს არის იმიტაცია და არ არის რეალობა, მიმართულია იმისკენ, რომ იმ ადამიანმაც კი, ვინც იცის იმის შესახებ რომ თვალს ადევნებს გადაცემას და მომავლის ქრონიკების რეკონსტრუქციას, მთელი თავისი გონებით შეიცნოს და შეიგძნოს მომავალი საშინელება, შეეშინდეს მომავლის გამო, რადგან ეს ყველაფერი ძალზედ დამაჯერებელი და ეფექტურია, აბა ისე ხომ მთელი ეფექტი დაიკარგებოდა ეკრანის კუთხეში წითლად რომ ციმციმებდეს “იმიტაცია” ან “ეს არ არის რეალური მოვლენები”.

მთელი 30 წუთის განმავლობაში მხოლოდ ორჯერ ნახსენები მინიშნება ზაფხულზე, პანიკაში ჩავარდნილ ადამიანს შესაძლოა გამორჩეს, გამოეპაროს ასეთი მცირე დეტალი, ან ის, ჩამოვარდნილი ჭურვების ჩვენებისას, მოკლე სახელოებიანი მაისურები რომ ეცვა ხალხს (აგვისტოს ომის კადრები იყო), უბრალოდ ვერ შეამჩნიოს. მითუმეტეს, თუ არსად  წერია რომ ეს ყველაფერი მართლა არ ხდება და გეუბნებიან თბილისთან ბრძოლა მიდისო, გაჩვენებენ კადრებს, სადაც ჩანს ბრძოლის მომენტები, ტყვიები, ჭურვები და ღამეა, ისევე როგორც მაგ დროს რეალურად თბილისში და წამყვანი გეუბნება, აი ეს კადრებიცო! ის კი, როდესაც ამბობს: “მუნდიალის დაწყებას ზეიმობს მთელი მსოფლიო”, შეიძლება ვერც გაიგო პანიკის გამო, შესაძლოა იფიქრო წამყვანია პანიკაში და რაღაც აურიაო, ან კიდევ ზუსტად მაგ მომენტში ჩემოდნებს ალაგებდე და გარბოდე სადმე თბილისიდან შორს…

ამ გადაცემის მიზანი მგონი ისედაც გასაგებია ყველასთვის, ის რასაც ჩვენი  ხელისუფლება უკვე წლებია აკეთებს: მტრის ხატის შექმნა, ყველაფრის მისთვის გადაბრალება, მოვლენების შესაძლო განვითრების მიმართ შიშის დანერგვა, პანიკის დათესვა და ასე შემდეგ.

ბურჯანაძის და ყველა ოპოზიციური პარტიის მტრებად და მოღალატეებად წარმოჩენა და მიუხედავად იმისა, რომ ეს იყო ვითომ შესაძლო მომავლის წინასწარმეტყველება, ეს ფაქტი მაინც სადღაც დაილექება ადამიანის ქვეცნობიერში.

არჩევნებში თუ მოიგებებ ნაციონალები, ხოლო ოპოზიცია გაპროტესტებას მოინდომებს, კარგად დაფიქრდებით ამის მერე, წახვიდეთ თუ არა მიტინგზე და თუ მაინც წახვედით და იქ ხელისუფლებამ ჯარი მოგისიათ ან გესროლათ, ნუ გაუწევთ წინააღმდეგობას ან ნუ გამოთქვამთ აღშფოთებას, გახსოვდეთ ბურჯანაძე და რუსეთი…

აი ესეთი იყო ამ გადაცემის პათოსი ჩემი აზრით… საინტერესო კი ისაა, რომ საბოლოოდ ამ გადაცემის შემდეგ სწორედ ბურჯანაძე და ნოღაიდელი გამოვიდნენ კარგი ტიპები, ხოლო ხელისუფლება და “იმედი” სრულ იმპოტენტ–დეგენერატებად გამოჩნდნენ…

იმავე ბურჯანაძეს ან ნოღაიდელს სრული უფლება აქვთ სასამართლოში უჩივლონ ტელეკომპანია “იმედს”, ისევე როგორც ყველა იმ მოქალაქეს, რომელმაც ამ გადაცემის ყურების შედეგად მიიღო ფიზიკური ან ფსიქოლოგიური ტრავმა.

ჭეშმარიტად მიაღწია თავის ჩაფიქრებული მიზანს ამ გადაცემის ავტორმა, ვერაფერს იტყვი, გენიოსია… სამწუხაროდ ბევრი მსგავსი გენიოსი გვყავს ამ ქვეყანაში… თუნდაც ის დადგმული გენიალური შოუ გაიხსენეთ, რუს ჯარისკაცებს რომ მიუვარდა ჩვენი მამაცი პრეზიდენტი…

და ბოლოს, შეიძლება ვცდები, მაგრამ მგონი ამ გადაცემას თავისუფლად შეიძლება მივანიჭოთ დეზინფორმაციის კატეგორია. დეზინფორმაციის, რომელიც გავლენას ახდენს ადამიანის სულიერ სიმშვიდეზე და იწვევს მასობრივ პანიკას (ფაქტია, რომ პანიკა გამოიწვია და იმის მტკიცება, რომ არ უნდა გამოეწვია არის სრული უგუნურობა). ეს კი მგონი სამართლის მიხედვით დასჯადი ქმედებაა. ნორმალური ქვეყანა რომ ვიყოთ, არამგონია ის ხალხი ვინც პასუხისმგებელია ამ გადაცემაზე, ადეკვატურად არ დასჯილიყვნენ, მაგრამ ეს ხომ საქართველოა, ჭეშმარიტი გენიოსების ქვეყანა

p.s. ამბობენ, რომ 55 წლის ქალი გარდაიცვალა გულის შეტევით, ბიჭი ჰყავდა ჯარშიო… ბრავო მაესტრო, ბრავო…

ეს 15 წესი ჩემი მოგონილი რომ არ არის მიხვდებოდით, მეტიც, ის ქართულიც კი არაა, ჩემმა ერთმა მეგობარმა დაპოსტა თავის დროზე და მე იმდენად მომეწონა რომ შევინახე და ახლა გადავწყვიტე ადგილის შევსების მიზნით აქ დამედო. გადათარგმნილია ჩემს მიერ. მაშ ასე, დავიწყოთ:

15 საქციელი, რომელიც აფიქრებინებს თქვენ მშობლებს, რომ გიჟი ხართ:

1. სახლში ყველგან უკან სდიეთ.

2. გამოეცით ძროხის ხმები, როდესაც თქვენ სახელს ახსენებენ.

3. შეეჯახეთ კედლებს.

4. უთხარით მათ, რომ თქვენი რელიგია ტანსაცმლის ტარებას გიკრძალავთ.

5. დილის 4 საათზე შედით მათთან ოთახში და გაბადრული სახით “დილა მშვიდობისა” უსურვეთ.

6. ამოაძვრეთ ვინმეს თმის ღერი და იყვირეთ: “დე–ენ–ემი!”.

7. დაიმაგრეთ სტიკერი, რომელსაც აწერია: “მე დეგენერატი ვარ”.

8. იყოლიეთ 20 წარმოსახვითი მეგობარი და ელაპარაკეთ მათ მუდამ.

9. ხალხში ყოფნისას იყვირეთ: “არა მამა/დედა, არ მინდა შენთან სექსი!”.

10. გააკეთეთ ის რასაც ისინი გეტყვიან.

11. გადმოხტით სახურავიდან, სცადეთ გაფრიდნეთ.

12. დაიჭირეთ მათი ხელი და ჩურჩულით უთხარით: ” მე მკვდრებს ვხედავ”.

13. ყველაფერზე რასაც გეტყვიან, იყვირეთ: “მატყუარა!”.

14. სცადეთ გაცუროთ იატაკზე.

15. მთელი ღამე აკაკუნეთ მათი ოთახის კარზე.

რა თქმა უნდა გასაგიჟებელი არაფერია და არც ისეთი სასაცილოა სკამიდან რომ გადავარდე, მაგრამ იმედია თვითონ ამ საქციელების წარმოდგენა და მითუმეტეს იმის წარმოდგენა, თუ როგორ მოგყავთ ისინი თქვენ სისრულეში, კარგ ხასიათზე მაინც დაგაყენებთ. 🙂

ამას წინათ ერთ–ერთ ცნობილ ქართულ ( და მგონი ერთადერთ ადეკვატურად მოქმედ) კინო საიტზე წავაწყდი ასეთი შინაარსის განცხადებას: ერთ–ერთი “იუზერი” ამტკიცებდა, რომ ოსკარი ეკუთვნოდათ ტარანტინოს და “უსახელო ნაბიჭვრებს” (რაშიც აბსოლუტურად ვეთანხმები) და ამ ფილმის მართლაც არც თუ ისე ცოტა ღირსებებთან ერთად, ასახელებდა იმ ფაქტს, რომ ეს კინოფილმი არის ახალი სიტყვა კინემატოგრაფიაში, ხოლო “ავატარი” კი მხოლოდ სპეც–ეფექტებში, რაზეც ასევე ერთ–ერთი კინომოყვარული, რომელიც დიდი პოსტის მეშვეობით უმტკიცებდა ყველას თავის ინტელექტუალობას, ამბობდა რომ “ავატარს” ეკუთვნოდა ოსკარი და ამ განცხადებას ასაბუთებდა იმ ფაქტით, რომ “ავატარი” არის რევოლუცია კინოში, რადგან მასში იქნა გამოყენებული აბსოლუტურად ახალი ტექნოლოგიები, ისევე როგორც თვის დროზე ჯორჯ ლუკასმა გამოიყენა პირველმა სპეც–ეფექტები “ვარსკვლავურ ომებში“… მაგალითად მან კიდევ რამოდენიმე ფილმი და რეჟისორი მოიყვანა და რაც საგულისხმოა, ჩამოთვალა ყველა იმ ტექნოლოგიის დასახელება, რაც პირველად გამოიყენა ამა თუ იმ რეჟისორმა, ამა თუ იმ ფილმში, რითიც უფრო მეტად ახალი ტექნოლოგიების სპეციალისტის შთაბეჭდილება დატოვა, ვიდრე კინოთმცოდნისა, მაგრამ ეს არაა მთავარი, მთავარი აქ ორი რამ არის:

პირველი: ყველა ჩამოთვლილი ფილმის და რეჟისორის გახსენებისას, პირველი რაც თავში მოგივა არის: ბლოკბასტერი! და ბევრი ფული! ბევრი ფული და ბლოკბასტერი!

მაგრამ ამაზე უფრო მთავარია მეორე, ამ კინოთმცოდნეს ფრაზა, რომელითაც იწყებს თავის ქადაგებას. აი ისიც სიტყვა–სიტყვიტ, დიდებული Ctrl C / Ctrl V – ს ან უფრო გავრცელებულად,  copy/paste–ის გამოყენებით: “ფილმს რაც არ უნდა მაგარი შინაარსი და აზრი ქონდეს კინემატოგრაფიაში გადატრიალებას ვერ მოახდენს. მაგი მხოლოდ ფილმის გადაღების ტექნიკას შეუძლია” –  აი ეს უკვე ძალიან საინტერესოდ მომეჩვენა, ამ ახალგაზრდის (ან შეიძლება არც არის ახალგაზრდა, თუმცა ასეთი აზროვნებით 22 წელზე მეტს არ მივცემდი) აზრის გაცნობამდე, რატომღაც სულ მეგონა რომ რევოლუციას კინოში ახდენდა ფილმი და არა ახალი ტექნოლოგიებით დამზადებული კამერა ან ახალი კომპიუტერული ეფექტები. ქაღალდის გაუმჯობესებას არ მოუხდენია გადატრიალება ლიტერატურაში, ისევე როგორც ხმის ჩამწერი აპატარების განვითარებას მუსიკაში…

რა თქმა უნდა ტექნიკამაც მოახდინა გავლენა კინოზე და მის განვითარებაზე, მაგალითად მაშინ როდესაც უხმო კინო, ხმოვანი გახდა, ან მაშინ როდესაც ფერადი ფილმები გამოჩნდა ეკრანზე (თუმცა შავ–თეთრს დღესაც იღებენ და დამეთანხმებით თავისებური დიდებული ეფექტი ისევ აქვს), შემდეგ კი იყო სპეც–ეფექტების გამოჩენა და ახლა კი 3D…

ტექნოლოგიების განვითრების ამ ეტაპებს თუ შევადარებთ, 3დ–ს აშკარად, უკონკურენციო ბოლო ადგილი უჭირავს, რადგან ის კინოსთვის, მისი შინაარსისთვის, არაფერს ცვლის, აბსოლუტურად არაფერს, ეს უბრალოდ არის თვალის მოსაჭრელი საშუალება, რომელსაც გვერდზე გადააქვს კინოს ნამდვილი ფასეულობა. 3D კინემატოგრაფიაში არის კიდევ ერთი საშუალება მეტი ფულის გაკეთების და ჭეშმარიტი ხელოვნების უკანა პლანზე გადაწევის, ხოლო წინა პლანზე გასართობი ინდუსტრიის წამოწევის…

ჩემი აზრით ძალზედ დამაფიქრებელია ის ფაქტი, რომ ადამიანებს სიამოვნებას აღარ ანიჭებს არაფერი, თუ იქ გასართობი ელემენტი არაა… მუსიკაში – შიშველი “ნაშები”, ლიტერატურაში – უაზრო დეტექტივები, კინოში – უაზრო ბოევიკები…  სანახაობა ერთი სიტყვით…  ამ ყველაფერზე თავში მე მხოლოდ ერთი სიტყვა მომდის: დეგრადაცია!

ადამინის გონების დეგრადაცია, ბრბოს დეგრადაცია, რომელიც ისე ახლოს არის ორუელის1984“–ის სცენართან, როგორც არასდროს.

და რაც შემეხება პირადად მე, ვუდი ალენის ერთი ფილმის 5 წუთიანი მონაკვეთი მირჩევნია, მსოფლიოში არსებულ ყველა ბლოკბასტერ–ბოევიკს, “პოკაჰონტასის“… უკაცრავად “ავატარის” ჩათვლით.