ქვემოთ წარმოგიდგენთ ჩემი სუბიექტური მოსაზრებით შედგენილ ყველა დროის საუკეთესო როკ–ჯგუფების თხუტმეტეულს 🙂 (ათი ჯგუფი ცოტად მომეჩვენა). თითო ჯგუფს ბონუსად მოვაყოლებ მათ საფირმო კომპოზოციას, რომელთანაც ასოცირდება ეს ჯგუფი პირველ რიგში, ან უბრალოდ ეს კომპოზიცია საუკეთესოა მათ შემოქმედებაში, ისევ და ისევ ჩემი აზრით, რა თქმა უნდა 🙂
15. Uriah Heep
ჩემი ბავშვობის ერთ–ერთი საყვარელი ჯგუფი, რომელიც ცოტა არ იყოს გადაფასებულია საქართველოში. დაახლოებით ათი უკვდავი კომპოზიციით, რომელთაგანაც განსაკუთრებით გამოირჩევა რა თქმა უნდა ეს:
ხარისხით უკეთესი ვერსიაც არის, მაგრამ იქ სოლისტი უკვე ბერნი შოუ არის, ნამდვილი “ჰიპი” კი ჩემთვის პირველ რიგში ბაირონთან და მის განუმეორებელ მელანქოლიურ ხმასთან ასოცირდება.
14. Jimmy Hendrix Expirience
ბენდი, რომლის წევრების პატივისცემის მიუხედავადაც, მხოლოდ ერთი კაცისგან შედგებოდა, ისევე როგორც კიდევ ერთი ჯგუფი, რომელიც შედის ამ 15–ეულში. ქვემოთ კი გთავაზობთ კომპოზიციას, რომელსაც აქვს ერთ–ერთი ყველაზე ამაღელვებელი და ჟღერადი დასაწყისი მუსიკის ისტორიაში
13. Jethro Tull
კიდევ ერთი ჯგუფი, რომელზეც შეგვიძლია ვთქვათ, რომ მხოლოდ ერთი კაცისგან შედგებოდა. ერთ–ერთი ყველაზე კოლორიტული ადამიანი მუსიკალურ სამყაროში, ადამიანი ორკესტრი – იან ანდერსონი.
მართალია აქ იანი ფლეიტაზე არ უკრავს, მაგრამ მაინც საკმაოდ საინტერესო საყურებელია მისი ქცევა სცენაზე 🙂
12. The Who
ერთ–ერთი ყველაზე დაუფასებელი ჯგუფი საქართველოში, ჯგუფი სადაც 4–დან სამი წევრი ნამდვილი გიჟი და შეშლილი იყო: კეიტ მუნი, როჯერ დელტრი და პიტერ თაუნშენდი – სამი არანორმლაური, რომელთა ქცევაც სცენაზე და მის მიღმა აბსოლუტურად არაპროგნოზირებადი იყო. და ბასისტი ჯონ ენტვისლი, რომელიც ვითომ ყველაზე ნორმალური ტიპი იყო, არადა 57 წლის ასაკში გარდაიცვალა ნარკოტიკების დიდი დოზის გამო… ბასზე დაკვრის მისი მანერა კი რევოლუციური იყო და გავლენა მოახდინა უამრავ მუსიკოსზე, რის გამოც ის დამსახურებულად ითვლება ერთ–ერთ საუკეთესო ბასისტად ისტორიაში, ისევე როგორც ჯგუფის ყველა წევრი, მუნი – დრამერებში, თაუნშენდი – გიტარისტებში, დელტრი – სოლისტებში, ხოლო მთლიანად ჯგუფი – ჯგუფებში 🙂
11. Rainbow
ბლექმორის მიერ დაარსებული ჯგუფი, რომელმაც ნამდვილი აღიარება მოუტანა რონი ჯეიმს დიოს. მისი წევრები სხვადასხვა დროს იყვნენ კოზი პოუელი, როჯერ გლოვერი, ჯო ლინ ტერნერი და სხვა გამოჩენილი მუსიკოსები. ამ ჯგუფმა გვაჩუქა უამრავი დაუვიწყარი კომპოზიცია და რომელიმეს ამორჩევა მართლაც რთულია, მაგრამ ფორმატის მიხედვით უნდა ამოვარჩიოთ.. ამიტომ იყოს ეს:
10. Grand Funk Railroad
პირადად ჩემი ერთ–ერთი საყვარელი ჯგუფი, საკუთარი განუმეორებელი სტილით. ალბათ ყველაზე დაუფასებელი ჯგუფი საქართველოში, მის შესახებ ბევრმა არც კი იცის…
სულ სამი ამერიკული ბენდია ამ სიაში: ჰენდრიქსი, გრანდ ფანკი და კიდევ ერთი, რომელიც რეიტინგში ცოტათი წინ იმყოფება 🙂
სამწუხაროდ ამ გენიალური კომპოზიციის არც კლიპი და არც ცოცხალი ჩანაწერი არ მოიპოვება Youtube-ზე.
9. Dire Straits
გენიალური ჯგუფი, რომელიც ყველას ამერიკელები ჰგონია თავიანთი სტილის გამო 🙂
ქვემოთ კი შემოგთვაზებთ ალბათ ყველა დროის ერთ–ერთ საუკეთესო როკ კომპოზიციის Live ვერსიას…
8. The Rolling Stones
რა შეიძლება ვთქვა ამ ჯგუფზე ახალი? არც არაფერი, უბერებელი ბრიტანელი ნარკომანები, რომლებიც დღემდე იმ სიმაღლეზე არიან, რომელზეც 1964 წელს ავიდნენ და არ ჩამოსულან…
ეს კომპოზიცია საუკეთესო ნამდვილად არაა, მაგრამ ყველაზე პოპულარული ნამდვილად არის.
7. Black Sabbath
ჯგუფი, რომელსაც ალბათ ყველაზე სახელიანი და ძლიერი სოლისტები ჰყავდა ისტორიაში: ოზი ოზბორნი, რონი ჯეიმს დიო, იან გილანი…
ეს ბენდი ზეთის ხილივით არის, ან გიყვარს, ან გეზიზღება, შუალედი არ არსებობს… ალბათ ეს ყველაფერი გამოწვეულია მათი მუსიკის და ზოგადად მათი სტილით.
ისევ და ისევ პოპულარული კომპოზიცია და არა საუკეთესო
6. The Doors
ჯონ ლენონთან ერთად ყველაზე ქარიზმატული პიროვნება მუსიკის ისტორიაში: ჯიმ მორისონი. მუსიკოსი, მომღერალი, პოეტი… საუკეთესოობაზე ბევრ კომპოზიციას აქვს პრეტენზია, მაგრამ როცა საქმე პოპულარობაზე მიდგება, მაშინ ეს სიმღერა უკონკურენტოა:
5. The Beatles
ბევრს ალბათ ეს შეცდომა გგონიათ და ამ ჯგუფს პირველ ადგილზე ელოდით, მაგრამ… მიუხედავად ყველაფრისა, მიუხედავად უამრავი გენიალური კომპოზიციისა, უდიდესი პოპულარობისა, უდიდესი გავლენისა… როგორც მუსიკოსები ჯონიც, პოლიც, ჯორჯიც და მითუმეტეს რინგო სუსტები იყვნენ და მათი კომპოზიციებიც ზედმეტად მარტივია მუსიკალური თვალსაზრისით.
საუკეთესოზე ან პოპულარულზე პრეტენზია დაახლოებით 20–მდე სიმღერას ექნება, რადგან საქმე ეხება “ბიტლებს”, მაგრამ მოდით მაინც ერთი ამოვარჩიოთ, რომელიც კარგიც არის და თან პოპულარულიც:
4. Deep Purple
საქართველოში ალბათ ეს ჯგუფი პირველ ადგილზეა პოპულარობით, ბითლზი თუ გაუწევს ამ კომპონენტში წინააღმდეგობას… ბევრს არაფერს ვიტყვი, რადგან ალბათ ყველამ ყველაფერი იცით ამ ჯგუფის შესახებ, ხოლო ვინც არ იცით… რაიმეს თქმას აზრი არც აქვს 🙂
ერთ–ერთი ყველაზე “იკონური” კომპოზიცია ისტორიაში…
3. Led Zeppelin
ძალზედ ძნელი იყო ამ და წინამდებარი ჯგუფს შორის არჩევნის გაკეთება, მაგრამ საბოლოოდ საპატიო სამეულში მაინც ზეპელინი შევიყვანე. გადამწყვეტი ფაქტორი მისი პოპულარობა იყო მსოფლიოს მასშტაბით, პოპულარობა, რომელიც Deep Purple–ს არც კი დაესიზმრებოდა. ზეპელინის თავისუფლად აქვს პრეტენზია ითვლებოდეს ყველაზე პოპულარულ როკ–ჯგუფად მსოფლიოში. კონკურენციას მხოლოდ “ბითლზი” და ამ რეიტინგის მეორეადგილოსანი თუ გაუწევენ.
2. Queen
ჩემი უსაყვარლესი ჯგუფი, ჯგუფი, რომლის გამოც დავიწყე მუსიკის მოსმენა, ჯგუფი რომელმაც შემაყვარა როკი. მეტს არაფერს არ ვიტყვი გარდა ერთისა: ხალხო, ჯგუფს ქვია Queen და არა ფრედი მერკური! ეს ნამდვილად არ არის ის შემთხვევა, როდესაც ბენდს ჰყავს ერთი გამოკვეთილი ლიდერი, როგორც მაგალითად Jethro Tull-ის შემთხვევაში, Queen-ს ჰყავდა გენიალური დრამერი როჯერ ტეილორი, მშვენიერი ბასისტი ჯონ დიკონი და ლეგენდარული გიტარისტი ბრაიან მეი. ძალიან ბევრი ცნობილი და გენიალური კომპოზიცია სწორედ მეის დაწერილია, ხოლო ბოლო წლების ყველა სიმღერა მთლიანად მთელი ჯგუფის შრომის შედეგია, ასე რომ Queen არ არის მხოლოდ ფრედი მერკური.
თუმცა, რა თქმა უნდა, ფრედის გარეშე ეს ჯგუფი ალბათ ვერაფერს მიაღწევდა, რადგან მერკური იყო გენიალური და დარჩება ჩემთვის ყველა დროის საუკეთესო სოლისტად.
1. Pink Floyd
მოიძიეთ სახლში ლექსიკონი, მოძებნეთ იქ სიტყვები, რომლებიც აღნიშნავენ ყველაფერ კარგს – ეგ სიტყვები აქ უნდა ეწეროს…
ნაწყვეტი ფილმიდან The Wall:
მეორე გიტარის პარტიის პირველი სამი წამი არის საუკეთესო რამ, რაც კი მომხდარა მუსიკაში ბოლო 50 წლის მანძილზე.
ტატოს ბლოგი 